Подарок тренеру. «Поставы-ПМЦ» — ФК «Браслав» — 15:0

*Чэмпіянат Віцебскай вобласці па футболе tc «*Чэмпіянат Віцебскай вобласці па футболе »

(2-ая ліга, 5-ты тур)

З першых хвілін сустрэчы стала зразумела, што ў гэтым матчы перавага пастаўчан над сапернікам будзе звышадчувальнай. Гаспадары вельмі хацелі парадаваць балельшчыкаў пасля дзвюх папярэдніх няўдач і зрабіць своеасаблівы падарунак свайму трэнеру В. М. Грантоўскаму, у якога напярэдадні быў дзень нараджэння. А браслаўчане цяпер перажываюць няпросты перыяд змены пакаленняў, бо завяршыў футбольную кар’еру шэраг іх ветэранаў.

Непрыемнасці для гасцей пачаліся ўжо ў пачатку матча з траўмы іх абаронцы, якога вымушаны былі замяніць. Гаспадары трывала ўзялі пад свой кантроль мяч, а госці толькі адбіваліся. На 12-ай хвіліне Яўген Грантоўскі адкрыў лік. Гэты нападаючы з вопытам гульняў у чэмпіянатах Беларусі яшчэ праз некалькі хвілін завяршыў атаку ўдарам сходу. Пазней Яўген мог вызначыцца ў трэці раз, але быў груба збіты варатаром браслаўчан, за што суддзя выдаліў галкіпера з поля. Праўда, перад гэтым эпізодам госці ўжо мелі ў свае вароты чатыры мячы, але некалькі сваіх небяспечных атак змаглі правесці.

Больш за гадзіну браслаўчанам прыйшлося гуляць у меншасці, месца на апошнім рубяжы ў іх заняў палявы ігрок. Гасцям да перапынку ўдалося больш не прапусціць, а вось у другім тайме яны прыкметна здалі фізічна і сталі проста не паспяваць за перамяшчэннямі саперніка. Пры такой відавочнай перавазе трэнер пастаўчан зрабіў замены па рэгламенце, выпусціў на поле сем свежых, маладых ігракоў, якія і завяршылі разгром каманды Браслава.

У гэтай сустрэчы ў складзе гаспадароў вызначыліся сем футбалістаў, а Руслан Зелянкевіч — тройчы. З розных пазі­цый па два галы ў вароты саперніка правялі Раман Мядзведзеў, Дзмітрый Кундра, Ілья Цыунель, Валерый Пліско. Гледачы цёпла віталі таксама трапны стрэл у выкананні героя суботняга матча Ігара Павініча, а пасля матча праводзілі каманду з поля працяглымі апладысментамі.

Пасля гэтай перамогі пастаўчане з 7 ачкамі вярнуліся на трэцяе месца ў турнірнай табліцы, бо наш прамы канкурэнт з Докшыц на сваім полі прайграў з лікам 0:2 лідару — “Полацкгазу”. Зараз у чэмпіянаце будзе перапынак у сувязі з розыгрышам Кубка Віцебскай вобласці. Пасля яго завяршэння адновяцца гульні абласнога першынства.

Уладзімір ШЫК.