Проект неограниченных возможностей

Сустрэча адбылася ў рамках міжнароднага праекта “Сацыяльная інтэграцыя дзяцей і моладзі з абмежаванымі магчымасцямі ў Віцебскай вобласці”. Ён рэалізуецца з 2005 года сумесна са шведскімі спецыялістамі. Яны неаднойчы наведвалі Віцебск і знаёміліся з формамі працы беларускіх калег. Падчас чарговага візіту — ужо другога ў гэтым годзе — для іх была арганізавана паездка па рэгіёнах Віцебшчыны — пастаўскім і браслаўскім.

Наш раён стаў першым прыпынкам замежнай дэлегацыі. І невыпадкова: падтрымка людзей з абмежаванымі магчымасцямі ў Пастаўскім рэгіёне на самым высокім узроўні. Пра гэта гаварыла начальнік аддзела развіцця сацыяльнага абслугоўвання насельніцтва аблвыканкама Вера Мікалаеўна Астапенка, якая разам са сваім намеснікам Інгай Віктараўнай Глушонак суправаджала гасцей.

Іх у той дзень чакала насычаная праграма, якая пачалася з сустрэчы са старшынёй райвыканкама Віктарам Сяргеевічам Гутаравым. Шведскі бок прадстаўлялі Ханс Ёрген Вальхельд, Моніка Ёхансан Б’ёрк, Тчандар Карл Джымі Франчэска і Ёхансан Гульві Ірэнэ Інгегард, якія прыехалі з горада Хальмстад. Беларускі — намеснік старшыні Пастаўскага райвыканкама Юрый Мікалаевіч Кісялёў, начальнік раённага ўпраўлення па працы, занятасці і сацыяльнай абароне насельніцтва Пётр Леанідавіч Курто і дырэктар тэрытарыяльнага цэнтра сацыяльнага абслугоўвання насельніцтва Дзіяна Іванаўна Пякарская.

Размова атрымалася непрацяглай і па-сяброўску нязмушанай. Віктар Сяргеевіч коратка расказаў пра наш горад і раён, акрэсліў асноўныя кірункі сацыяльнай палітыкі, спыніўся на аргані­зацыі працы з людзьмі з абмежаванымі магчымасцямі. Замежнікі ў сваю чаргу расказалі пра некаторыя аспекты іх работы з самымі неабароненымі слаямі грамадства — інвалідамі і пажылымі людзьмі.

Шведская сістэма сацыяльнай аховы насельніцтва лічыцца адной з самых паказальных у свеце. Дзіяна Іванаўна Пякарская ў гэтым пераканалася асабіста — у маі сёлетняга года яна наведала краіну вікінгаў і ф’ёрдаў у складзе дэлегацыі Віцебскай вобласці. Падчас сустрэчы ў выканкаме яна падзялілася ўражаннямі ад той паездкі, найперш адзначыўшы камп’ютарызаванасць і механізаванасць шведскіх устаноў сацыяльнага абслугоўвання насельніцтва.

Сапраўды, лепш адзін раз убачыць, чым сем  разоў пачуць. Вось і шведская дэлегацыя, не губляючы часу, накіравалася ў аддзяленне кругласутачнага знаходжання па вуліцы Ленінскай у Паставах. Там іх хлебам-соллю сустракала загадчыца Юлія Сяргееўна Чалей і пастаяльцы. Ганаровыя госці з непадробнай зацікаўленасцю з дапамогай перакладчыка распыталі ў іх пра здароўе, настрой. Найбольш іх здзівілі 101-гадовая Лідзія Іосіфаўна Протас і 92-гадовая Часлава Мікалаеўна Гродзь, якія ў сваім надзвычай паважаным узросце і выглядаюць выдатна, і аптымізму не губляюць.

Наступным прыпынкам стала аддзяленне сацыяльнай адаптацыі, рэабілітацыі і дзённага знахо­джання інвалідаў. Загадчыца Вольга Алегаўна Гінько правяла кароткую экскурсію па ўстанове, пазнаёміла з маладымі людзьмі, якія наведваюць установу, расказала пра формы работы з імі, сярод якіх нямала творчых. Д. І. Пякарская ў сваю чаргу расказала, што пасля наведвання Швецыі ў яе з’явілася ідэя рэарганізаваць гэтае аддзяленне на замежны манер, далучыўшы да яго суседнюю нежылую кватэру. У ёй плануецца наладзіць суправаджальнае пражыванне інвалідаў.

Наведалі ганаровыя госці і Лынтупскае аддзяленне кругласутачнага знаходжання. Яго загадчыца Надзея Тадэвушаўна Гатоўская азнаёміла дэлегацыю з умовамі пражывання пажылых людзей, расказала пра арганізацыю працы з імі, прадэманстравала творчасць пастаяльцаў.

Чакала шведаў і культурная  праграма: яны наведалі пастаўскі Дом рамёстваў, турыстычны комплекс “Салаў­іны гай”, а таксама касцёл Святога Яна Хрысціцеля ў Камаях, дзе не пераставалі здзіўляцца ўнутранаму ўбранству святыні, гучанню аргана і праніклівым спевам Алены Даўжук.

— Водгукі ад паездкі ў шведскай дэлегацыі толькі станоўчыя, — расказала пасля завяршэння візіту Дзіяна Іванаўна Пякарская. — Іх асабліва ўразіла, колькі душы, пачуццяў нашы работнікі ўкладваюць у працу з пажылымі, людзьмі з абмежаванымі магчымасцямі. Спадабаліся чысціня, утульнасць нашых аддзяленняў. Пастаянная праца ў гэтым кірунку не можа не заўважацца. Толькі сёлета мы зрабілі два поўныя рамонты ад­дзяленняў. Вялікая работа праведзена за кошт спонсарскіх сродкаў. Калі за мінулы год яна склала 10, 5 мільёна рублёў, то за першае паўгоддзе сёлетняга — 25 мільёнаў.

Дзіяна Іванаўна падкрэсліла, што сувязі пастаўскага ТЦСАН наладжаны не толькі са Швецыяй. Нядаўна пададзена заяўка на беларуска-аўстрыйскі праект, мэтай якога з’яўляецца адкрыццё яшчэ аднаго аддзялення тэрытарыяльнага цэнтра ў нашым горадзе — на базе цяперашняга цэнтра “Юнацтва” па вуліцы Зялёнай.

Ёсць дамоўленасць па абмене вопытам і з кіраўніцтвам літоўскага Швянчоніса, куды пастаўчане плануюць наведацца ў бліжэйшы час.

Можна не сумнявацца ў тым, што супрацоўніцтва са Швецыяй будзе працягвацца. Дакладна вядома, што дэлегацыя  з гэтай краіны зноў наведае Віцебск у снежні сёлетняга года — тут запланавана правядзенне навуковай канферэнцыі, удзел у якой прымуць і пастаўчане.

Іна СНЯЖКОВАЙ.
Фота аўтара.