Второе место в Беларуси

Галіна Зямчонак.

17-18 жніўня ў сталічным парку імя Горкага адбыўся  фестываль Смачнага Блога.  Яго ўдзельнікамі і гасцямі  сталі прадстаўнікі Беларусі, ЗША, Італіі, Украіны, Літвы, Казахстана і Расіі. У першы дзень фестывалю прайшоў І рэспубліканскі кулінарны турнір “Залаты кіцель-2013” — прафесіянальны конкурс на лепшага повара Беларусі. У знакамітай  кампаніі повараў і шэф-повараў вядомых рэстаранаў, бараў і кафэ сталіцы і іншых буйных гарадоў рэспублікі не разгубілася і майстар-повар кафэ “Церамок” філіяла “Каапгандаль №2 Пастаўскага  райспажыўтаварыства” Галіна Зямчонак.

Запрашэнне прыняць удзел у прэстыжных спаборніцтвах Галіна Анатольеўна атрымала ад Гіль­дыі повараў і шэф-повараў Беларусі, членам якой стала ў гэтым го­дзе. Знайшоўшы падтрымку ў кіраўніцтва раённага спажывецкага таварыства, цвёрда вырашыла даказаць, што і ў правінцыі працуюць прафесіяналы. Да гэтага Галіна Зямчонак у ліку 50 повараў Мінска ўдзельнічала ў тэлевізійным адборы да чэмпіянату свету па хакеі 2014 года і была прызнана адным з лепшых повараў рэспублікі. Потым была перамога ў рэспубліканскім конкурсе спажывецкай кааперацыі на званне “Лепшы па прафесіі”. Ёй прысвоены званні “Майстар-повар”, “Чалавек года Белкаапсаюза” і “Чалавек года Пастаўшчыны”.

І вось чарговае выпрабаванне, якое ацэньвала салідная судзейская брыгада ў складзе шэф-повараў з Украіны, Беларусі і Італіі. Галіна Анатольеўна  ўдзельнічала ў дзвюх намінацыях: па прыгатаванні страў са свінога мяса і птушкі. На кожнае заданне адводзілася па гадзіне. Пастаўчанка праявіла максімум майстэрства і фантазіі і па суме выстаўленых ба­лаў заняла другое месца ў агульным заліку, прызнана другім лепшым поварам Беларусі. Акрамя таго, за лепшую страву з птушкі атрымала залаты, а за лепшую страву з мяса — бронзавы медалі.

Выдатны поспех! Асаблівая яго каштоўнасць у тым, што Галіна апярэдзіла амаль усіх повараў-мужчын, якія пераважалі сярод удзельнікаў  кулінарнага турніру.

— Дасягнуць такой вышыні, — адзначыла Галіна Анатольеўна, — дапамаглі добры настрой, душэўная раўнавага, адчуванне таго, што ка­лісьці выбраная прафесія і сёння прыносіць задавальненне і радасць.

Тэкст і фота Пятра КУРЫЛОВІЧА.