Старшыня Навагрудскага райвыканкама ўручыў ключы ад аўтамабіля старшаму ўчастковаму інспектару міліцыі Пятрэвіцкага сельсавета

Старшыня Навагрудскага райвыканкама Анатолій Маркевіч днямі ўручыў ключы ад новенькага аўтамабіля “ВАЗ-2121” старшаму ўчастковаму інспектару міліцыі адміністрацыйнага ўчастка Пятрэвіцкага сельсавета Паўлу Зізюку. Згодна з рашэннем аблвыканкама, аўтамабіль куплены за бюджэтныя сродкі.

Як падкрэсліў Анатолій Маркевіч, уручэнне такога падарунка інспектару – гэта першая ластаўка. У мінулым годзе пры дапамозе бюджэтных сродкаў, сродкаў сельскагаспадарчых арганізацый і бізнесу абнавілі аўтамабільны парк цэнтральнай раённай бальніцы. Цяпер вырашана кожны год набываць па аднаму аўтамабілю для РАУС, бо ад мабільнасці гэтай службы часта залежаць і жыццё людзей, і забеспячэнне парадку ў грамадстве.

Павел Зізюк у органах унутраных спраў працуе ўжо больш за дваццаць гадоў, з якіх дзесяць займае пасаду ўчастковага інспектара. На яго ўчастку заўжды парадак і высокая раскрывальнасць злачынстваў, хаця пад началам 24 вёскі на тэрыторыі Пятрэвіцкага сельсавета. Да таго ж сельсавет мяжуе з Лідскім і Дзятлаўскім раёнамі, што таксама выклікае пэўныя складанасці ў працы. Участковаму інспектару прыходзіцца яшчэ дадаткова кантраляваць Ацмінаўскі і Ладзеніцкі сельсаветы.

– Цяпер буду паспяваць усюды, – прызнаецца Павел Зізюк, – і вынікі працы стануць яшчэ лепшымі.
Кацярына МЯТЛІК