Баранавіцкі суд стаў на бок дзяржаўнай газеты ў справе аб падмане чытачоў

Фота з архіва Віктара Сырыцы Суд не задаволіў ні аднаго з патрабаванняў актывіста, які прасіў надрукаваць абвяржэнне несапраўднай інфармацыі, якую дала газета, і вярнуць выдаткі паездкі на свята, якога не адбылося.
На працягу месяца адбыліся тры слуханні па зыскавай заяве. 27 жніўня Баранавіцкі гарадскі і раённы суд вынес свае рашэнне па справе, поўнасцю падтрымаўшы адказчыкаў і не задаволіўшы ні адно з патрабаванняў актывіста.   “Рэдактар газеты Міхаіл Шубіч і прадстаўнікі райвыканкама Дзмітрый Варвашэня і Таццяна Еўмянкова імкнуліся запэўніць суд, што зрабілі ўсё магчымае, каб папярэдзіць удзельнікаў свята, хоць аб’яву ў газету аб пераносе часу правядзення свята яны не падалі. Карацей, мы самі вінаваты, што не патэлефанавалі ў райвыканкам і не праверылі інфармацыю”, - расказаў Віктар Сырыца аб заключным паседжанні суда.   Арэндаваўшы аўтобус, Віктар Сырыца 2 чэрвеня арганізаваў паездку аматараў гісторыі на культурніцкі фэст у гонар паўстанцаў 1863 года, аб якім паведаміла дзяржаўная газета, але на месцы правядзення свята нікога не было. Госці, не дачакаўшыся арганізатараў, усклалі кветкі да помнікаў паўстанцам і з’ехалі.   Супраць Сырыцы была заведзена справа аб правядзенні несанкцыянаванага масавага мерапрыемства.   Актывіст праз суд патрабаваў ад газеты публікацыі аб тым, што надрукаваная інфармацыя аб правядзенні свята была несапраўднай, а таксама хацеў спагнаць з газеты выдаткі на арэнду аўтобуса ў суме 2,3 мільёна рублёў, і дзяржаўную пошліну на падачу зыскавай заявы, але безвынікова.   Сырыца паведаміў, што будзе падаваць скаргу ў Брэсцкі абласны суд. “У мяне няма надзеі, што нашу скаргу задаволяць, бо за двадцаць год маёй дзейнасці такога выпадку не было. Але, магчыма, я даб’юся праўды ў Вярхоўным судзе”, - распавёў ён.